അദ്ദിക്ർ

ഭാരം വഹിക്കുന്ന ഒരാള്‍ക്കും മറ്റൊരാള്‍ക്കുവേണ്ടി ഒന്നും ചെയ്യാന്‍ പറ്റാത്ത ദിനമാണ് അന്ത്യനാള്‍ എന്ന് 6: 164; 17: 15; 35: 18; 39: 7; 53: 38-42 തുടങ്ങിയ സൂക്തങ്ങളിലെല്ലാം ഫുജ്ജാറുകള്‍ വായിച്ചിട്ടുണ്ട്. എല്ലാ ഓരോരുത്തരും നഗ്നരായി നഗ്നപാദരായി ചേലാകര്‍മ്മരഹിതരായി ഒറ്റക്കൊറ്റക്കായി അല്ലാഹുവിന്‍റെ മുമ്പില്‍ 15 വയസ്സിന് ശേഷമുള്ള ജീവിതത്തിന്‍റെ ഓരോ നിമിഷത്തെക്കുറിച്ചും ഉത്തരം പറയേണ്ടതുണ്ട് എന്ന് 6: 94; 18: 48; 19: 95 തുടങ്ങിയ സൂക്തങ്ങളിലെല്ലാം പറഞ്ഞിട്ടുണ്ട്. ഓരോരുത്തരുടെയും പിരടിയില്‍ ബന്ധിച്ചിട്ടുള്ള കര്‍മ്മരേഖ അന്ന് തുറന്ന പുസ്തകമായി പുറത്തെടുത്ത് കൊടുത്തു കൊണ്ട് അവരവരെക്കൊണ്ട് വായിപ്പിച്ചാണ് വിചാരണ നടത്തുക എന്ന് 17: 13-14; 18: 49; 23: 62-63; 36: 12; 45: 28-32; 58: 6; 78: 27-29 എന്നീ സൂക്തങ്ങളില്‍ ഫുജ്ജാറുകള്‍ വായിച്ചിട്ടുണ്ട്. അന്ന് അവരുടെ നാവുകളും തൊലികളും കേള്‍വികളും കാഴ്ചകളും കൈകാലുകളും മറ്റ് അവയവങ്ങളും ഭൂമി തന്നെയും അവര്‍ക്കെതിരെ സാക്ഷ്യം വഹിക്കുന്നതാണ് എന്ന് 24: 24; 36: 65; 41: 19-24; 99: 4 തുടങ്ങിയ സൂക്തങ്ങളിലും പറഞ്ഞത് അവര്‍ വായിച്ചിട്ടുണ്ട്. ഞാന്‍ നിങ്ങള്‍ക്കുവേണ്ടി വാദിക്കുന്ന വക്കീലൊന്നുമല്ല എന്ന് പറയാന്‍ 6: 66 ല്‍ പ്രവാചകനോട് ആവശ്യപ്പെട്ടിട്ടുണ്ട്. 39: 41 ല്‍, നിശ്ചയം നാം നിന്‍റെമേല്‍ ഈ ഗ്രന്ഥമിറക്കിയത് മനുഷ്യര്‍ക്കുവേണ്ടി ലക്ഷ്യത്തോടുകൂടിയാണ്, അപ്പോള്‍ ആരെങ്കിലും അത് ഉപയോഗപ്പെടുത്തി സന്മാര്‍ഗത്തിലാവുകയാണെങ്കില്‍ അതിന്‍റെ ഗുണം അവനുതന്നെയാണ്, ആരെങ്കിലും അതില്‍ നിന്ന് വ്യതിചലിച്ച് വഴികേടിലായാല്‍ അതിന്‍റെ ദോഷവും ആ ആത്മാവിന് തന്നെയാണ്, നീ അവര്‍ക്കുവേണ്ടി വാദിക്കുന്ന വക്കീലൊന്നുമല്ല എന്നും; 39: 62 ല്‍, അല്ലാഹുവാണ് എല്ലാ വസ്തുക്കളുടെയും സ്രഷ്ടാവ് എന്നും അവന്‍ തന്നെയാണ് എല്ലാ വസ്തുക്കളുടെ മേലും കൈകാര്യകര്‍ത്താവെന്നും പറഞ്ഞിട്ടുണ്ട്. അല്ലാഹുവിനെ കൈകാര്യകര്‍ത്താവായി സ്വീകരിക്കുക അദ്ദിക്റിനെ സത്യപ്പെടുത്തുന്ന വിശ്വാസികള്‍ മാത്രമാണ്. നാഥനില്‍ നിന്നുള്ള ഗ്രന്ഥം ലഭിച്ചതിന് ശേഷം അല്ലാഹുവിന്‍റെ സൃഷ്ടികളെ -മുഹമ്മദ്, ഈസാ, മൂസാ തുടങ്ങിയ പ്രവാചകന്മാരെ തന്നെയാണെങ്കിലും- കൈകാര്യകര്‍ത്താവായി സ്വീകരിക്കുന്നവര്‍ കാഫിറായ പിശാചിനെ കൈകാര്യകര്‍ത്താവായി സ്വീകരിക്കുന്ന യഥാര്‍ത്ഥ കാഫിറുകളാണ്. അവരുടെ ജിന്ന് കൂട്ടുകാരനായ പിശാചാകട്ടെ, ആ ഉത്തരവാദിത്തത്തില്‍ നിന്ന് ഒഴിഞ്ഞുമാറുന്നതും 'എനിക്ക് നിങ്ങളില്‍ യാതൊരു സ്വാധീനവുമുണ്ടായിരുന്നില്ല, നിങ്ങളുടെ വഴികേടിന് നിങ്ങള്‍ നിങ്ങളെത്തന്നെ കുറ്റപ്പെടുത്തിക്കൊള്ളുക' എന്ന് പറയുന്ന രംഗം 14: 22; 43: 36-39; 50: 27-29; 59: 16-17 തുടങ്ങിയ സൂക്തങ്ങളിലെല്ലാം മുന്നറിയിപ്പ് നല്‍കിയത് ഇത്തരം ഫുജ്ജാറുകളാണ് വായിച്ചിട്ടുള്ളത്. നിഷ്പക്ഷവാനായ നാഥന്‍ ആരെയും സ്വര്‍ഗത്തിലേക്കോ നരകത്തിലേക്കോ ആക്കുന്നില്ല. മറിച്ച് അവര്‍ വായിച്ച, കേട്ട, തൊട്ട ഗ്രന്ഥമാണ് അവര്‍ക്കെതിരെ വാദിച്ച് സാക്ഷി നിന്ന് അവരെ നരകക്കുണ്ഠത്തിലേക്ക് തള്ളിവിടുന്നത്. 2: 119; 3: 30; 4: 37-38 വിശദീകരണം നോക്കുക.